“Һомай” башҡорт теле һәм әҙәбиәте уҡытыусыларын илһамдандырҙы

РФ Мәғариф министрлығының дәүләт дөйөм белем биреү сәйәсәте һәм мәктәпкәсә белем биреүҙе үҫтереү департаменты директоры урынбаҫары Сергей Васин ҡатнашыусыларҙы онлайн сәләмләне һәм емешле эш теләне. Ул телде ябай аралашыу ҡоралы ғына түгел, ә халыҡ аҡылын, мәҙәниәт һәм традицияларҙы һаҡлау ҡоралы булыуын да билдәләне. Туған телдәрҙе һайлау өсөн ата-әсәләр генә түгел, ә уҡытыусы-тәрбиәселәр ҙә ҙур роль уйнағанын билдәләне.

БР Мәғариф һәм фән министрлығының дәүләт программаларын һәм төбәк-ара хеҙмәттәшлекте тормошҡа ашырыу буйынса бүлек начальнигы Вадим Рәхмәтуллин, Башҡорт теле һәм әҙәбиәте уҡытыусыларының II Бөтә Рәсәй съезының мөһим маҡсаттарын һәм бурыстарын һыҙыҡ өҫтөнә алып, һуңғы йылдарҙа бик грамоталы ҡарарҙар ҡабул ителеүен билдәләне.

– Мәғариф һәм фән министрлығында милли мәғариф буйынса ресурс үҙәге булдырылды. Башҡорт теле һәм әҙәбиәте уҡытыусылары Һәм уҡытыусылары ассоциацияһы ойошторола, уны Рифат Әйүпов етәкләй. Башҡорт телен һаҡлау, яҡлау һәм үҫтереү маҡсатында, Башҡортостан Башлығы указына ярашлы, 2019 йылдан алып йыл һайын 14 декабрҙә Башҡорт теле көнө билдәләнә. Башҡорт теленән диктант халыҡ-ара кимәлгә сыҡты. Быйыл беҙҙең акцияла 500 меңгә яҡын кеше ҡатнашты, – тине Вадим Рәхмәтуллин.

«Тамыр» балалар-үҫмерҙәр телеканалы директоры Гөлназ Ҡолһарина «Башҡортостан» телерадиотапшырыуҙар компанияһында тормошҡа ашырылған яңы проекттар, конкурстар тураһында мауыҡтырғыс итеп һөйләне. Шулай уҡ тарихи шәхестәр тураһындағы документаль фильмдарҙы, “Нурбостан” анимацион сериалын дәрестәрҙә ҡулланырға мөмкинлеге хаҡында белдерҙе.

Майҙансыҡта ҡатнашыусыларҙы башҡорт телен популярлаштырыу буйынса грант проекттарының уңышлы тәжрибәләре менән БР Башлығы Гранттары фондының генераль директоры Люция Сәйфуллина таныштырҙы. Һуңғы биш йылда 20 конкурс үткәрелде, уларға 4036 ғариза килде, тип билдәләне ул. Уларҙың 835-е еңеүсе булған һәм 1,3 миллиард һум күләмендә аҡса алған.

Шулай, мәҫәлән, 2023 йылда  «Мин башҡортса һөйләшәм» – «Я говорю по-башкирски» фестивале үткәрелгән, уның сиктәрендә эстраданың йәш йондоҙҙары ҡатнашлығында концерт булдырылған һәм башҡорт телен өйрәнеү буйынса 10 майҙансыҡ эшләгән.

Башҡорт телен һаҡлау һәм үҫтереү фонды хеҙмәткәре Гүзәлиә Исхаҡова башҡорт телендәге өҫтәл уйындарының тел өйрәнеүҙә әһәмиәте хаҡында һөйләне.

Юридик фәндәр кандидаты, Өфө фән һәм технологиялар университетының һанлы трансформация буйынса проректоры Айнур Хәйбуллин «Башпер» мәғлүмәт агентлығы системаһы менән таныштырҙы.

IT-белгес Айгиз Ҡунафин яһалма интеллект һәм уны туған телдәрҙе үҙләштереүгә нисек йәлеп итеү тураһында ентекле һөйләне.

Н. Мусин исемендәге 48-се башҡорт лицейы директоры Оксана Мөхәмәтйәнова майҙансыҡтың исеменең бик уңышлы һайланыуын белдерҙе.  Хәҙер уҡытыусылар үҙ эшендә яһалма интеллекты уңышлы ҡуллана ала аласағына ҡыуанды. Цифровизация – туған телдәрҙе һаҡлау һәм популярлаштырыу  өсөн мөһим аҙым икәнлеген билдәләне.

«Һомай» майҙансығындағы эштең икенсе өлөшөндә башҡорт теле һәм әҙәбиәте уҡытыусылары өсөн ғәмәли дәрестәр һәм уйындар үткәрелде.

Фото: Юлай Кәримова һәм Рәмзиә Ғәбитова

Сығанаҡ: “Молодежная газета”