Сибайҙы гөрләтә «Алтын»!

Сибай ҡалаһының «Алтын» балалар һәм үҫмерҙәр клубында быйыл «Алтын» фольклор ансамбле үҙ эшен башлап ебәрҙе. Уны педагог-ойоштороусы Зилә Сәлимйән ҡыҙы Һаҡмарова етәкләй. 1989 йылда Стәрлетамаҡ мәҙәниәт-ағартыу училищеһын тамамлап, бына инде 30 йылға яҡын мәҙәниәт һәм сәнғәт өлкәһендә үҙ эшен яратып башҡарған белгес сәнғәткә, мәҙәниәткә ылыҡҡан, йыр-бейеүгә ғашиҡ ҡатын-ҡыҙҙарҙы үҙенең эргәһенә йәлеп иткән. Һәр эште башлап ебәргәндә көтөлмәгән ауырлыҡтар, ҡаршылыҡтар сығып тора, әммә тырыш ҡатын бирешмәй. Уға тап ошо мәлдәрҙә тормош иптәше Насип Һаҡмаров ярҙамға килә. Музыкаль яҡтан биҙәүсе, оҫта гармунсы һәм үҙешмәкәр композитор булараҡ, ансамблде йәнләндереүсе лә ул. Уның яҙған бер нисә йырын бик яратып башҡара «алтын»дар.