Зауыҡ һәм егәрлелек тәрбиәләй

Зөлфиә БИКБУЛАТОВА – Әлшәй районының Иҫке Аҡҡолай ауылынан. «Беҙ үҫкәндә барыһы ла балаҫ һуға ине. Был шөғөл ғаиләбеҙҙә ашарға бешереү, кер йыуыу, өй йыйыштырыу кеүек үк ғәҙәти булды. Өләсәйем дә, инәйем дә, туғандарыбыҙ ҙа һуҡты. Беҙ, дүрт ҡыҙ ҙа, ошо шөғөлдөң нескәлектәрен һеңдереп йөрөнөк. Ни тиклем мөғжизәүи мөхиттә үҫкәнебеҙҙе әле генә аңлайым. Әсәйебеҙ Нәсимә Мырҙагәрәй ҡыҙы – танылған балаҫсы, туҡһан алты йәшендә республика фестивалендә ҡатнашып, балаҫ һуҡты. Ҡәҙерлем бар яҡлап өлгөр булды, хатта тире эшкәртеп, беҙгә бүректәр тегеп кейҙерҙе», – ти оҫтабикә.

Мәләүез ҡалаһында химия заводында эшләй Зөлфиә апай. Ауыр замандарҙа аҡсаһыҙ илап ултырмай ул, ҡыш сыҡҡансы 20–25 шәл бәйләй – шулай өс баланы аяҡҡа баҫтыра. Сәйләндән иҫ киткес матур гөлләмәләр, лампа-яҡтыртҡыстар яһай. Тыуған ауылына ҡайтҡас, балаҫ һуғыу теләге уяна. Зәкирә апаһына барып, үлсәмдәрен ала ла, үҙе станок ҡороп ҡуя. «Уның бер нимәһе лә юҡ – таҡта алып ҡайттым да быстым, ҡаҙаҡлап эшләнем дә ҡуйҙым», – ти, иҫе лә китмәй.

«Төҫтәрҙе күп ҡулланыу – эш мәлендә күңелле, ә мин үҙем ике төҫлө балаҫтарҙы хуп күрәм. Апайым менән бергә һуғып, туғандарыбыҙға ла бүләк итәбеҙ», – тип бүлешә ул. Йәйге каникулға килгәндәрендә ейәндәрен дә ошо боронғо шөғөлгә өйрәтә – үҙҙәре һуҡҡан ултырғыс ябыуҙарын ғорурлыҡ менән өйҙәренә алып ҡайтып, йәйеп ҡуйған улар. Өләсәләре белә: ижади хыялдан башҡа түҙемлек тә, көс тә кәрәк. Кешелә зауыҡ, егәрлелек тәрбиәләй был матур шөғөл.

Автор:Гөлшат Ҡунафина

Читайте нас:

Новости партнеров

Яу яланында ла икмәк бешерер Баймаҡ ҡыҙы

Соңгы кыңгырау кайчан яңгыраячак?

«Бумага» не сдаётся