Ҡотло донъя – йәнгә дауа

Энә менән бейәләй-бирсәткә, шәл, башлыҡ, шарф, кофта кеүек кейемдәрҙе күп бәйләй ул. Бер саҡ ырғаҡ менән таныша һәм ныҡлап мауығып китә. «Өләсәйҙәрсә шаҡмаҡ» биҙәге менән ултырғыс ябыуының айышына төшөнөп алғансы әллә нисә мәртәбә һүтеп ташлай, әммә маҡсатына ирешә. Ҙур япмалар бәйләү күңеленә ята. Сатрашлап сигеү өсөн тәғәйенләнгән һыҙма буйынса бәйләгән плед та уңышлы сыға, дәртләнеп дауам итә. Интернеттан оҡшаған һүрәттәр буйынса ла, үҙе уйлап табып та бәйләй. Иң ҡатмарлыларына өс аҙна самаһы ваҡыт китә. Эше менән социаль селтәрҙәге сәхифәһендә бүлешһә, унда йыйылып киткән дуҫтары үҙҙәренә лә бәйләп биреүен һорай башлай.
«Рәсем ни хәтлем ҡатмарлыраҡ булһа, шул тиклем ҡыҙығыраҡ. Дәртләнеп, сәмләнеп тотонам эшкә. Хеҙмәт емешемдең кемдеңдер өйөн биҙәүе – минең өсөн ҙур ҡыуаныс», – ти Айгөл. Йәй көнө баҡсаһында булышырға ярата, һәр буш торған ерҙе, хатта таштарҙы ла һүрәт төшөрөп биҙәй ул. Бәйләү өсөн ҡышты көтә, ни өсөн был миҙгел оҙонораҡ түгел икән, тип уйлап та ҡуя.