Баймаҡ егәрлеләре

Ҡолсора ауылынан Рәүилә Ғафарова – «Зарифа» фольклор ансамбленең оҫта, егәрле ҡатнашыусыһы. Башҡорт йолаларына битараф булмаған апай үҙе күлдәк, камзул, ҡашмау, селтәр тегә. Бала саҡта өләсәһендә күргән баш кейеменә оҡшатып эшләгән таҡыяһын бәйгегә тәҡдим итә.

Баймаҡ ҡалаһында йәшәүсе 64 йәшлек Фәниә Хәбибуллина иҫ китмәле үҙенсәлекле ҡул эштәре, татлы аш-һыуы менән тирә-яҡта дан алған. Бөтмөр хужабикә йыр-моңға ла маһир, ҡалалағы «Ҡомартҡы» ансамбле менән төрлө ерҙәрҙә сығыш яһай. Ағинәйҙәр хәрәкәтенең әүҙем ағзаһы ла ул. Ҡыҙы Эльвинаға сәйлән менән сигеп әҙерләгән таҡыяһы күҙҙең яуын алырлыҡ.