Оҙаҡ йәшәү өсөн баҫма

Быйылғы йыл Һаулыҡ һәм оҙаҡ йәшәү йылы тип иғлан ителде. Кемдең күпме йәшәре маңлайына яҙылған, тыуым менән үлемде кисектереп булмай, тигәнерәк һүҙбәйләнештәр аша халҡыбыҙҙың ғүмергә мөнәсәбәте һиҙелеп ҡалғандай. Әммә был мәҡәлдәр, моғайын, булған хәлгә күнеү, артыҡ ҡайғы-һағышҡа бирелмәү, хәсрәтле кешене йыуатыу өсөн дә әйтеләлер. Яҙмышҡа, Хоҙайға ышаныу үҙеңдең сәләмәтлегеңә ҡул һелтәп ҡарауҙы аңлатмай. Хәрәкәттә – бәрәкәт, тип, күптәр йылды, төркөмдәр менән саф һауаға сығып, етеҙ уйындар уйнау, хәрәкәтләнеү менән башлап ебәрҙе. Ҡартайыу – ул мускулдарҙың эшләмәй тороуы арҡаһында бушауы, мөсһөҙләнеүе икән. Хәрәкәт ярҙамында уларға көс инә, хатта һырҙар яҙыла, артыҡ майҙар китә. Шатлыҡ гормондары тап хәрәкәтләнгән саҡта барлыҡҡа килә, баҡтиһәң!