Кәтибә Кинйәбулатованың тыуған ауылы – Мәүлиттә.

“Башҡортостан ҡыҙы” журналының беренсе баш мәхәррире Кәтибә Кинйәбулатованың тыуған ауылы – Силәбе өлкәһе Арғаяш районы Мәүлит ауылында беҙҙе бик йылы ҡаршы алдылар. Осрашыуға мәүлиттәр генә түгел, ә күрше-тирәләге ауылдарҙан да килгәйнеләр. Байрамғол ауыл клубы директоры Элина Радик ҡыҙы Сәлимова, Мәүлит ауылы китапханасыһы һәм клубтың мәҙәни ойоштороусыһы Гүзәл Мирхәт ҡыҙы Ғөбәйҙуллина сараны бик матур итеп әҙерләгәндәр. Яҙыусының тормош юлы ентекле өйрәнелгән, һирәк фотоһүрәттәр табылған һәм уларҙан күргәҙмә эшләнгән. Әҙибәнең һеңлеләре Зилбәр, Тәнзилә, Ракия, Рәйхана, Арғаяш районының крайҙы өйрәнеүсеһе Флүрә Ким ҡыҙы Истамғолова саҡырылған.

Сараға етәкселәр – Байрамғол ауыл советы хакимиәт башлығы Зилиә Рәшит ҡыҙы Хәмиҙуллина, Арғаяш районы депутаттары йыйылышы депутаты Юлиә Ғәлим ҡыҙы Заһиҙуллинаның булыуы сараның мәртәбәһен күтәрҙе.

Кәтибә Кинйәбулатованың яҡташтары данлыҡлы ауылдашының рухын һаҡлайҙар: шиғырҙарын уҡыны, тормош юлын хәтергә төшөрҙөләр. Китапханала яҙыусының ата-әсәһенең, тыуған йортоноң фотолары һаҡлана. Ауылдаштары тыуған нигеҙен иҫләйҙәр, ҡәберенә сәскәләр һалып, тәрбиәләп торалар. Сара аҙағында мәсеткә барып Кәтибә Кинйәбулатованың рухына аят уҡыттылар.

Сарала ҡатнашыусылар “Башҡортостан ҡыҙы” журналына ихлас яҙылдылар.