ТӘЛИҒӘ БИКТАШЕВА

Студент сағында уҡ Башҡорт академия драма театры сәхнәһендә М. Фәйзиҙең «Ғәлиәбаныу» мелодрамаһында төп ролде башҡарған. Һәләтле йәш артистканы М. Буранғоловтың – «Башҡорт туйы», Дауыт Юлтыйҙың – «Ҡарағол», Х. Ибраһимовтың «Башмағым» кеүек спектаклдәренә лә йәлеп иткәндәр. Тәлиғә Бикташева үҙенең ижад ғүмерендә тиҫтәләгән сағыу образдар тыуҙырған. Уның иң уңышлы ролдәренең береһе – Ғәлимә (М. Ғафури. «Ҡара йөҙҙәр»). Б. Бикбай, А. Мөбәрәков, А. Фадеев, Ә. Атнабаев кеүек билдәле авторҙар әҫәрҙәрендәге төп образдары актрисаның ижади биографияһында төп урынды ала. Тәлиғә Бикташева үҙе уйнаған ролдәрен һәр саҡ милли һыҙаттар менән үреп алып бара.

Актрисаның тормош юлдашы – билдәле актер, режиссер Тимербулат Имашев. Ҡыҙҙары Эльмира Недосеева Мәскәүҙә йәшәй, әле хаҡлы ялда.