Халҡым, һиңә ниҙәр булған!

Һеҙҙең иғтибарығыҙға өр-яңы йыр тәҡдим итәбеҙ. Уны Рәмил Сурағол һүҙҙәренә Илдар Шәрипов ижад иткән. Темаһы бик актуаль. Нисек уйлайһығыҙ, йыр кешенең яҙмышын, ниәттәрен үҙгәртә аламы? Һеҙҙән фекер ишетергә теләйбеҙ һәм хаттар көтөп ҡалабыҙ.

Сит телдәрҙә тел асыла,

Әсә теле онотолған.

Туған халҡым, ғәзиз халҡым,

Бөгөн һиңә ниҙәр булған?

Туған халҡым, ғәзиз халҡым,

Бөгөн һине булмай аңлап.

Ҡәберендә ата-баба

Яталыр бит һине ҡарғап.

Ҡушымта:

Сит ҡәүемдәр ҡосағында

Бер көн ҡала күрмә иреп.

Телһеҙ ҡала күрмә, берүк,

Туған халҡым, ғәзиз халҡым,

Телһеҙ, илһеҙ ҡалма, берүк.

Сит милләттең гүзәлдәрен

Яҡын күрә беҙҙең ирҙәр.

Балалары сит телдәрҙә

«Әсәй» тиеп өндәшәләр.

Сит милләттең балаларын

Имеҙәләр ҡатын-ҡыҙҙар.

Беҙ элекке халыҡ түгел,

Ныҡ үҙгәргән беҙҙең йөҙҙәр.

Йорт-диуарҙа һәм урамда

Туған телеңдә һин һөйләш.

Үҙ милләтеңдән үҙеңә

Һайла һин шәп кейәү-кәләш.

Башыңды ғорур күтәреп,

Йәшә булып ут һәм ялҡын.

Телле бул һин, илле бул һин,

Елле бул һин, ғәзиз халҡым!

Ҡушымта:

Сит ҡәүемдәр ҡосағында

Һин ҡалмаҫһың бер көн иреп,

Туған телең, изге динең,

Тарихыңды йәшә белеп.

Телле булып, илле булып

Йәшә, халҡым, бөйөк булып!

Читайте нас:

Новости партнеров