Яугир ҡыҙҙар рухына – сирендәр

“Был аллеяны беҙ Бөйөк Еңеүҙе яҡынайтыуға яу яланында ғүмерен фиҙа ҡылған, баҫыуҙарҙа, фабрика-заводтарҙа тырышып эшләп йөрәген, көсөн йәлләмәгән бөтә гүзәл заттарға бағышланыҡ”, – тине Башҡортостан Ҡатын-ҡыҙҙар союзы рәйесе Рәшиҙә Солтанова. Белеүебеҙсә, Башҡортостандан фронтҡа 4 мең ҡатын-ҡыҙ китә.

Күптәре кире әйләнеп ҡайта алмай, яу яланында баш һала. Шуныһы ла ҙур мәғәнәгә эйә: ошо урамдағы Максим Горький исемендәге 3-cө гимназиянан 18 йәше тулған ҡыҙҙар эшелоны Сталинград фронтына ебәрелә. Киләсәктә уларҙың исемен мәңгеләштереү өсөн ошо хаҡта һөйләгән таҡтаташ ҡуйыу ҙа ниәт ителә.

Аллеға ҡатын-ҡыҙҙар араһында тәүге булып Советтар Союзы Геройы исеменә лайыҡ булған Валентина Гризодубова сортлы сирендәр ултыртылыуы ла ҙур әһәмиәткә эйә. Был акция Рәсәйҙең барлыҡ ҡалаларында бара икән.

Ә Өфө ҡалаһында бөгөн ултыртылған аҡ, күк сирендәр урамдан үткәндәргә Бөйөк Ватан һуғышында еңеп сыҡҡан ҡаһармандар рухын иҫкә төшөрөр, ә яҙҙарын, ҡаһарман рухлы бөйөк ҡатындарға сикһеҙ рәхмәт булып, һауаға хуш еҫтәрен таратыр, тип ышанғы килә.