Ҡатын-ҡыҙ – милләт әсәһе конкурсы тамамланды

Баш ҡаланың Конгресс-холл бинаһында үткәрелгән сара республика төбәктәренән иң-иңдәрҙе йыйҙы. Хөрмәтле ҡатын-ҡыҙҙарҙы республика башлығының тормош иптәше Каринэ Хабирова сәләмләне.

Ҡатын-ҡыҙҙың йәмғиәттә тотҡан роле күптән киң даирәләргә сыҡты. Ул әсә лә, ҡатын да, һөнәрмән дә, хатта үҙ хеҙмәтенең иң яҡшыһы ла була ала.

“Ҡатын-ҡыҙ – милләт әсәһе” конкурсының гүзәлдәре быйыл ун номинацияға дәғүә итте. Улар ҡатын-ҡыҙ – күп балалы әсә, лидер, оҫтабикә, йәш һәләт, өлкән быуын йәмәғәт эшмәкәре, педагог, мәҙәниәт белгесе тигән исемдәр өсөн ярышты.

Бүләкләнеүселәр араһында 11 бала табып үҫтергән әсәләр ҙә, үҙ эшен асҡан ханымдар ҙа, йәмәғәт эшендә әүҙем ҡатнашҡан йәштәр ҙә, йөҙйәшәр инәйҙәр ҙә бар ине. Улар республикабыҙҙың Саҡмағош, Миәкә, Бөрйән, Иглин, Баймаҡ, Күгәрсен, Ҡырмыҫҡалы райондары һәм Силәбе өлкәһе вәкилдәре.

Быйыл республикала ҡатын-ҡыҙҙар йәмәғәте хәрәкәтенә 100 йыл тулғанда, тағы ла бер төркөм гүзәл заттар Рабиға Ҡушаева исемендәге миҙалға лайыҡ булды. Уларҙың билдәлеләре – ғалимә Фирҙәүес Хисаметдинова, йәмәғәт эшмәкәре, шағирә Гүзәл Ситдиҡова, “Йөрәк һүҙе” проектының авторы Наилә Сәфәрғолова булһа, Иглиндән 100 йәшлек Саимә Тикеева, Баймаҡтан ҡатын-ҡыҙҙар хәрәкәте активисы Әнүзә Мәжитова, Әбйәлилдән Әҡлимә Хызырова, Федоровканан Хәлисә Багаева һәм башҡалар булды. Был награданы проектты ойоштороусы, Дәүләт Йыйылышы – Ҡоролтай депутаты, башҡорт ҡатын-ҡыҙҙары йәмәғәт ойошмаһы етәксеһе Гөлнур Ҡолһарина тапшырҙы.