М-5 һәм М-7 федераль трассаларҙы тоташтыра

Өфөлә Көнсығыш сығыу юлын төҙөү 1992 йылда башланғайны. Финанслау етмәү сәбәпле 2007 йылда туҡтатылды. Проект баш ҡала транспорт инфраструктураһын үҫтереү йәһәтенән үтә лә мөһим. Ул, М-5 һәм М-7 федераль трассаларҙы тоташтырып, юл йөрөү мәшәҡәттәрен күпкә еңеләйтәсәк, иҡтисад үҫешенә ыңғай йоғонто яһаясаҡ.

Кисә төҙөлөш урынына Башҡортостан башлығы Радий Хәбиров булды. Генераль подрядсы проектты ғәмәлгә ашырыуға әҙерлекте башлаған. Төҙөлөштөң дөйөм хаҡы – 33,5 миллиард һум. Шуның 24,45 миллиард һумы – капиталь грант (19,99 миллиарды — федераль бюджет аҡсаһы, 4,5 миллиарды – республика бюджеты аҡсаһы), 9,1 миллиарды – концессионер аҡсаһы.

Проекты финанслау ВТБ банкыһы менән концессия килешеүе һөҙөмтәһендә мөмкин булды. Көнсығыш сығыу юлы төҙөлөшөн 2023 йылда тамамлау күҙаллана.

Автор:Рәсүл Байгилдин

Читайте нас: