Башҡортостандың халыҡ яҙыусыһы Талха Ғиниәтуллин (әҙәби псевдонимы Анатолий Генатулин) арабыҙҙан китте

Талха Йомабай улы Ғиниәтуллин рус телендә ижад итеүсе башҡорт яҙыусыһы ине. Үҙенең ике исемле, сығышы хаҡында ул былай тип яҙған: «Яҙыусы булараҡ мин күберәк Анатолий Генатуллин булһам, ә күңелем менән һаман шул ялан аяҡлы, ауыл урамынан йүгереп барған башҡорт малайы Талха булып ҡалам».

Уның «Рябиновая гора», «Аюташ», «Золотая моя колыбель» «Вот кончится война» тигән китаптары киң даирә уҡыусыларға яҡшы таныш.

Ҙур яҙыусының вафаты авторҙы яратып уҡыған уҡыусыларҙы ла тулҡынландырҙы. Был көндәрҙә социаль селтәрҙәрҙә сыҡҡан яҙмаларҙа, айырым бер эпоха китте тип яҙҙы ижадсыны белгән кешеләр.

«Яҙыусының әҫәрен буш күңел менән вайымһыҙ ғына уҡып булмай. Һәр ҡайһыһы үҙенсә тәрән йөкмәткеле һәм ҡабатланмаҫ», - тип яҙа уның уҡыусылары.

Талха Ғиниәтуллин Учалы районы Ураҙ ауылында тыуған. 18 йәшенән Ленинград өсөн барған ҡаты алыштарҙа ҡатнаша. Һуғыштан һуң Мәскәүҙә, Максим Горький исемендәге әҙәбиәт институтын тамамлай. 1955 йылдан илебеҙҙең баш ҡалаһында йәшәй, әммә тыуған Учалы районы Ураҙ ауылы менән бәйләнешен өҙмәй.

Читайте нас: