Башҡортостан башлығы Радий Хәбиров Республика хөкүмәтен үҙе етәкләйәсәк

Республика Башлығының ике беренсе урынбаҫары буласаҡ. Был вазифаларға Андрей Назаров менән Илшат Тажетдинов тәғәйенләнде.Ете вице-премьерҙар араһында Рәиф Әбдрәхимов элеккесә төҙөлөш комплексына һәм юл хужалығына яуап бирә, Илшат Фәзрахманов ауыл хужалығы министры вазифаһында ҡала, Борис Беляев ҡарамағына торлаҡ- коммуналь хужалығы, тәбиғәт менән файҙаланыу һәм экология министрлығы, тариф сәйәсәте инә.

Ленара Ивановаға, вице-премьер вазифаһынан тыш, ғаилә, хеҙмәт һәм халыҡты социаль яҡлау министры вазифаһы ла йөкмәтелде. Ул һаулыҡ һаҡлау өлкәһе өсөн дә яуап бирәсәк.

Премьер-министрҙың яңы урынбаҫары Рөстәм Моратов иҡтисади үҫеш һәм инвестиция сәйәсәте министры итеп тә тәғәйенләнде. Ул һанлы сәйәсәт, эшҡыуарлыҡ, туризм һәм тышҡы иҡтисади бәйләнештәр министрлығының эшен күҙәтәсәк.

Быға тиклем Өфө ОМОНы командиры һәм Башҡортостандағы Росгвардия идаралығы начальнигы урынбаҫары булып эшләгән Ирек Сәғитов йәштәр сәйәсәте һәм спорт, ғәҙәттән тыш хәлдәр һәм юстиция эштәре дәүләт комитеттарының эше өсөн яуап бирәсәк.

Республика Башлығының матбуғат секретаре лә яңы вазифа биләне. Хәҙер Фәнүр Йәғәфәров мәғариф һәм фән, мәҙәниәт министрлыҡтары эшмәкәрлеген, мәғариф өлкәһендәге күҙәтеү һәм контроль идаралығы, матбуғат һәм киң мәғлүмәт сараларының эшен күҙәтәсәк.

Читайте нас: