Башҡортостанда ҡатын-ҡыҙҙарҙың аграр союзы төҙөлдө!

Өфөлә «Ауылда ҡатын-ҡыҙ эшҡыуарлығы: перспективалар һәм үҫеш юлдары» форумы үтте. Башҡортостан ҡатын-ҡыҙҙары советы рәйесе Рәшиҙә Искәндәр ҡыҙы Солтанова форумға саҡырылған уңышлы гүзәл заттарҙы Ауыл ҡатындары көнө менән тәбрикләне. БР Дәүләт Йыйылышы – Ҡоролтайҙың аграр мәсьәләләр, экология һәм тәбиғәттән файҙаланыу комитеты рәйесе урынбаҫары Руфина Алик ҡыҙы Шагапова иң ҡайнар теләктәрен еткерҙе һәм сәйәси яҡтан әүҙемерәк булырға саҡырҙы. БР ауыл хужалығы министры урынбаҫарҙары Ләлә Рифмир ҡыҙы Дәүләтова һәм Ирек Искәндәр улы Сураҡовтың был тармаҡҡа дәүләт тарафынан бирелгән гранттар, программалар хаҡында ентекле һөйләүен эшҡыуарлыҡ менән шөғөлләнеүселәр әһәмиәтле мәғлүмәти ярҙам тип ҡабул итте. Психодраматист, тренер Нина Мироновнаның «Ауыл ҡатынының яҙмышы һәм һөнәри үҫеше» тигән сығышы ҡанашыусыларҙың күңеленә айырыуса хуш килде. Психолог менән улар йәнле аралашыуға ҡушылды.

Әбйәлил районынан килгән Лилиә Зәбир ҡыҙы Мөхөтдинова йылҡысылыҡ хужалығын үҫтереү тәжрибәһе менән уртаҡлашты. Ул 50 ат 85 һыйыр малы тотҡан хужалыҡтың тауар етештереү буйынса сифатлы һәм һөҙөмтәле эшләүен, алға ҡуйған тотҡан маҡсаттарын һөйләне.

Йыйында Башҡортостан ҡатын-ҡыҙҙарының аграр союзы төҙөлдө һәм уның етәксеһе итеп Туймазы районында 15 йыл колхоз рәйесе булып эшләгән Лилиә Кәбир ҡыҙы Кәшфуллина һайланды.

Форумда республиканың төрлө төбәктәренән йөҙгә яҡын гүзәл зат ҡатнашты. Улар осрашыуҙың рәсми булмаған өлөшөндә – сәй табыны артында ла бер-береһе менән яҡынданыраҡ танышырға, мөһим тәжрибәләре менән бүлешергә тырышты. Күренекле сәнғәт әһелдәре Рәйлә Аҙнаҡаева һәм Мәрйәм Солтанова менән бергәләшеп йырҙар башҡарыу ҙа онотолмаҫлыҡ тәьҫораттар ҡалдырҙы.

Читайте нас: