-11 °С
Ҡар
Антитеррор
Бөтә яңылыҡтар
12 Сентябрь 2019, 19:19

Төркиә ҡунаҡтарын Өфөнөң архитектура үҙенсәлеге ҡыҙыҡһындырҙы

Башҡортостандың баш ҡалаһы Өфө үҙенең архитектура төҙөлөшө һәм тарихи ҡала булыуы менән сит ил кешеләрен ҡыҙыҡтыра. Айырыуса һуңғы йылдарҙа ҡалаларҙың эстетик биҙәлешенә, архитектура үҙенсәлегенә иғтибар арта башлағас, боронғоға мода кире ҡайтҡас, иҫке биналарҙы ҡайтанан төҙөкләндереү, биҙәү кеүек эштәргә ихтыяж артты. Төрлө тәҡдимдәр урындағы реставраторҙарҙан ғына түгел, ә сит илдән килгән төҙөүселәрҙән дә бар. Ошо көндәрҙә Өфөгә эшлекле сәфәр менән Төркиәнең Анкара инженерҙары Али Каракан һәм Өккеш Сай килде. Башҡортостандың баш ҡалаһында уларҙы башлыса боронғо, иҫке биналар ҡыҙыҡһындырҙы.

Инженер булһалар ҙа, ижад менән дә бәйле булған сит ил ҡунаҡтары «Башҡортостан ҡыҙы» журналына ла сәфәр ҡылды. Баҫманың мөхәррире Гөлназ Ҡотоеваның төрөк телендә яҡшы аралышыуы үҙ-ара һөйләшеүҙе тағы йәнлерәк итте. Журнал ярҙамында улар Башҡортостандың мәҙәни мираҫҡа ҡараған күсемһеҙ милек объекттарын файҙаланыу һәм һаҡлау үҙәге етәксеһе Данир Ғәйнуллин менән осрашты. Ҡунаҡтар, республикала реставрация эштәрендә ҡатнашыу мөмкинлеге менән ҡыҙыҡһынды. Данир Әхмәҙи улының билдәләүенсә, Башҡортостанда боронғо биналарҙы һаҡлап алып ҡалыу өсөн эштәр бара: «Айырыуса яҡын йылдарҙа ул тағы йәнләнәсәк. Бер йылдан үҙегеҙҙең тәҡдимдәрҙе индерә алаһыгыҙ. Бының өсөн Мәскәүҙән лицензия юллап алыу мотлаҡ», – тине етәксе.
Төркиә ҡунаҡтары Өфөнөң матур, әммә боронғо биналарҙың аҙ булыуын билдәләне. Иң күркәм урын тип Салауат Юлаев һәйкәлен танынылар.