Һайлау хоҡуғын һәр кем тиң тормошҡа ашырһын

Һау-сәләмәт кешегә һайлау көнөндә тауыш биреп ҡайтыу өсөн бары ваҡыт ҡына кәрәк булһа, инвалидтар өсөн һайлау участкаһына барып етеүе бик ҡыйын, ә ауыр хәлдәгеләр өсөн бөтөнләй мөмкин түгел. “Шуға күрә улар Конституция тарафынан билдәләнгән һайлау хоҡуҡтарын тормошҡа ашыра алһын өсөн бөтә шарттар тыуҙырырға ынтылдыҡ”, – ти Башҡортостан Республикаһы Ғаилә, хеҙмәт һәм халыҡты социаль яҡлау министрлығының матбуғат секретары Роза Кузьменко.

Март айында уҡ Үҙәк һайлау комиссияһы мөмкинлектәре сикләнгән кешеләрҙең һайлау хоҡуғын тәьмин итеү буйынса саралар планын раҫлаған. Уларҙың исемлеге аныҡланған, мәғлүмәт еткереү эше алып барылған, һайлауҙа шәхсән ҡатнашыу мөмкинлеген тәьмин итеү хәстәрләнгән. Урындарҙа комиссия ағзалары, йорттарына барып, һайлаусының нисек тауыш бирергә теләүен белешкән.

Һайлау комиссиялары урынлашҡан биналар коляскалы инвалидтар инерлек итеп ҡулайлаштырылған, пандустар ҡуйылған. Күреү һәләте насар кешеләр өсөн Өфөлә, Бәләбәйҙә, Стәрлетамаҡта, Белоретта махсуслаштырылған участкалар булдырылған. “Әгәр һайлаусы үҙе килеп тауыш бирә алмай икән, ул шылтыратыу менән комиссия ағзалары өйөнә барасағын аңлаттыҡ ”, – ти Роза Кузьменко. Республика һайлаусылары араһында 256 098 кеше (8,41 проценты) инвалид икәнлеген билдәләп үтәбеҙ.

Олег Яровиков фотоһы.

Читайте нас: