+30 °С
Болотло
Әҙәби балҡыш
20 Март 2025, 10:00
Салауат Әбүзәр. Һигеҙ һаны
«Һигеҙ һаны ике тамсы һымаҡ, Ике тамсы – Ғүмер нигеҙе!..» Наҙ һәм һөйөүгә тулышҡан яҙғы сәскә, һыулап һыуһын ҡанмаҫлыҡ саф шишмә ул ҡатын-ҡыҙ. Уның саҡматаштай сабырлығынан, боҙ иретер йылыһынан, уттай ҡайнар мөхәббәтенән, йән йылытыр ҡарашынан йәшәү яҡты, йырлы һәм нурлы. «Был донъяла күпме бәрәкәт бар – бөтәһе лә, тимен, ҡатын-ҡыҙҙан», – тигән бөйөк шағир Мостай Кәрим. Һәр көнөгөҙ матур үтһен, гүзәл заттарыбыҙ! Һеҙ – йән өрөүсе, йәшәтеүсе, йәшәртеүсе!
Салауат Әбүзәр. Һигеҙ һаны
Салауат Әбүзәр
Һигеҙ һаны –
Ҡатын-ҡыҙҙар һыны:
Өҙөлөрҙәй нескә билдәре.
Һигеҙ – игеҙ йөрәк,
Тигеҙ тормош,
Мөхәббәт һәм сафлыҡ билдәһе.
Һигеҙ һаны ике тамсы һымаҡ,
Ике тамсы –
Ғүмер нигеҙе!..
Ғашиҡтарҙың никах балдағы ла
Хәтерләтеп ҡуя
Һигеҙҙе.
Әммә тормош гел байрамдан тормай,
Йылдың көндәре күп
Һигеҙһеҙ.
Тик, һөйөклө ҡатын-ҡыҙҙарыбыҙ,
Нишләр инек икән беҙ
Һеҙһеҙ!
