0 °С
Ясна
Бөтә яңылыҡтар
Әҙәби балҡыш
1 Июнь 2021, 10:16
«Хыялдарым, ҡоштар кеүек, Бейеклеккә ашҡанда...»
Әлфис Ғаязов шиғриәткә лирик шиғырҙар менән килеп инде. Уларҙың күптәренә йырҙар яҙылған. Поэмалары иһә, замандың төрлө ваҡиғаларына бағышланған булыуына ҡарамаҫтан, бөтә кешелек өсөн мөһим проблемаларҙы күтәреп сыға. «Башҡортостан ҡыҙы» уҡыусылары уның шиғырҙарын йылы ҡабул иткәйне. Был һанда сираттағы ижад емештәрен тәҡдим итәбеҙ.
Мин – ғашиҡ!
Ярҙарына һыймай аға
Йылға ташып,
Үҙем бөгөн йылға кеүек –
Мин бит ғашиҡ!
Күңелем дә, йылғанан киң,
Ярһый шашып,
Тулҡындарын ярға ҡаға –
Мин бит ғашиҡ!
Мөхәббәттең ярҙарында
Гел аҙашып,
Йөрөр өсөн һәр саҡ әҙер –
Мин бит ғашиҡ!
Яҙғы Танып
Яҙғы Танып ярһып ташҡан саҡта,
Ярҙарына һыймай аҡҡан саҡта,
Бөҙрә талдар башын эйгән ине,
Талдар тулҡындарға тейгән ине.
Хыял диңгеҙендә бергә йөҙҙөк,
Муйыл сәскәләрен бергә өҙҙөк,
Онотма һин мине, тигән инең,
Ә мин әллә ниңә көлгән инем…
Танып ярҙарына тағы ҡайта,
Муйыл тағын шашып сәскә ата,
Беҙҙең араларҙа йылға ята –
Әллә минең, әллә һинең хата…
Ҡылған сәскә атҡанда...
Урау юлдар урау түгел
Йәшлегемә ҡайтҡанда,
Уй-хыялдар, мине уҙып,
Арғымаҡтай сапҡанда,
Ҡылған сәскә атҡанда...
Һандуғастарҙы йырлатып
Йәйге таңдар атҡанда,
Юлдарҙағы кәртәләрҙе
Бер ни тимәй ватҡанда,
Ҡылған сәскә атҡанда...
Йылдар ҡарын, юлдар саңын
Иңдәремдән ҡаҡҡанда,
Хыялдарым, ҡоштар кеүек,
Бейеклеккә ашҡанда,
Ҡылған сәскә атҡанда...
Ҡылған сәскә атҡанда,
Йәшлегемә ҡайтҡанда...
***
Күҙ йәштәрең менән минең
Сәсемде сылатмасы,
Йәштәр түкһәм, ышаныр тип,
Үҙеңде йыуатмасы...
Йәшле күҙҙәр, йылы һүҙҙәр –
Ысын түгел, был – уйын,
Күңелемдең йомшаҡ яғын
Табырға һинең уйың...
Үкенәм, тип мең мәртәбә
Ҡабатлау ысын түгел,
Ғәфү ит, тигән һүҙеңә
Ышанмай минең күңел...
Яратҡан кешем һин, тиеп
Һарылма муйыныма,
Үткәндәрҙә тороп ҡалды
Ысыны, уйыны ла...
Әсәйемә минең оҡшағанһың
Әсәйемә минең оҡшағанһың,
Әллә шуға һине яраттым?
Баштарымды ҡулдарыңа һалып,
Булған хәсрәттәрем таратам,
Күрергә тип һине йән атам.
Күңелемдең усағында шул саҡ
Дөрләп янып китә уттарым,
Хыялдарға ҡанат үҫеп китә,
Ғаләм буйлап йөҙә уйҙарым,
Асылалар барыр юлдарым.
Һинең ҡулдар, әсәй ҡулдарылай,
Һыйпап үтә маңлай һырҙарын,
Ҡолағымда сыңлай шул сағында
Ул йырлаған бишек йырҙары,
Юҡҡа итеп булған зарҙарым.
Һинең янда күңел тыныслығын,
Йырлап йәшәр өсөн йәм табам,
Ваҡ-төйәктән өҫкә күтәрелеп,
Киләсәккә оло юл һалам,
Һиңә килеп тағы һарылам.
Әсәйемә минең оҡшағанһың,
Шуға күрә һине үҙ итәм,
Йыраҡтарға китһәм, осрашыуҙың
Минуттарын һанап мин көтәм,
Һағыныуҙар менән көн үтә...
Читайте нас:
© 2020-2024 Сайт журнала "Башҡортостан ҡыҙы". Копирование информации сайта разрешено только с письменного согласия администрации.
Телефон
8 (347) 273-26-89
Электрон почта
Адресы
г. Уфа, ул. 50-летия Октября, 13, 7-й этаж
Редакция
8 (347) 272-63-02
Ҡабул итеү бүлмәһе
8 (347) 273-26-89