-11 °С
Ҡар
Антитеррор
Бөтә яңылыҡтар
Әҙәби балҡыш
1 Декабрь 2020, 13:31

«Беләм йәшәү хаҡын...»

Гөлгизәр ФӘЙЗИГөлшат Фәйзелғаян ҡыҙы Әхмәтҡужина (Гөлгизәр Фәйзи) – проза, драматургия, шиғриәт өлкәһендә эшләгән башҡорт яҙыусыһы, төрлө йылдарҙа республика баҫмаларында хеҙмәт иткән журналист. Ул – Башҡортостан Яҙыусылар союзы, Рәсәй һәм Башҡортостан журналистары берлеге ағзаһы, 30-лап пьеса, китап авторы. Әбйәлил ҡыҙы, үҙенсәлекле ҡәләмдәшебеҙ менән «Башҡортостан ҡыҙы» журналын күптәнге ижади хеҙмәттәшлек бәйләй. Был юлы автор күҙ асып йомған арала үткән тормош, тыуған ауыл, бала саҡ хәтирәләре, үкенесле уйланыуҙар менән һуғарылған шиғырҙар шәлкемен тәҡдим итә.

Һағындым
Һағындым...
Тыуған ауылымдың урамынан
Бер үтәһе ине кинәнеп.
Ғәзиз яҡҡа ҡайтып әйләнергә
Сит илдәрҙә күпме теләнем.
Күстәнемдең көрән еректәре
Алҡалары менән әйҙәне.
Төштәремә Суйынтапҡаныма
Йүгерә инем, ҡат-ҡат әйләнеп.
Теш ҡамашыр һыуын уртлай инем
Ҡарасмандың, Таштығойоноң;
Үмбәр түбә, Олотауға менеп,
Ҡоштар моңдарына ойоном.
Барыһы ла тик хыялда ҡалды...
Ҡайттым да бит тыуған ауылға,
Зилзиләләр үртәй күңелемде,
Ауылымды һаман һағынам.
Ул элекке түгел...
Кешеләр – ят,
Хатта таныштары икенсе.
Гүйә, үҙем бында тыумағанмын,
Гүйә, үҙем бында үткенсе...
Тәпәй баҫҡан изге ергенәмдең
Һәр бер ташы ғәзиз йәнемә.
Баш эйәһем килә һәр ҡайынға,
Урамдағы һәр төп әремгә.
Тәгәрәп йөрөп илағылар килә,
Зыяратта инде яҡындар.
Һағыныуҙан, рәнйеү, үкенестән
Ҡаты төйөр тора алҡымда.
...Бер әмәле булһа, үткәндәрҙе
Ҡайтарыр ҙа инем яңынан,
Йүгереп уҙыр инем урамымдан...
Юҡ шул әмәл...
Ә мин һағынам
Кешеләрҙең алсаҡ, матур сағын,
Йоҙаҡ эленмәгән йорттарҙы,
Бер туғандай, күрше-күлән менән
Аралашып йәшәгән саҡтарҙы.
Әлморонға һыуҙар һибә инем
Таштығойо тигән ҡоҙоҡтан...
Йортом нигеҙе күптән юҡҡа сыҡҡан,
Кем ҡулдары икән ҡоротҡан?!
Нигеҙ ҡоротоусы хаин бәндә
Йөрөп ята әле һаман да;
Уның исеме ҡара ҡандай ҡатҡан
Йәнемдәге тәрән ярамда.
Һағынам...
Бала саҡтан хәтеремдә ҡалған
Ауылымды һаман һағынам.
Үткәндәргә генә ҡайтып булмай,
Йәшәп кенә булмай яңынан...
Танһыҡ булһасы...
Ни бары бер миҙгел генә йәшәү,
Асып-ябыу ғүмер ишеген.
Донъялыҡтың ҡыуанысын күреп,
Танһыҡтары ҡанмай кешенең.
Иңдәренә ятҡан ауыр йөктө
Сабырлығы һынмай күтәрә.
Тормош ҡуя яңы һынауҙарын,
Хәсрәттәрен һала күптәргә.
Ни бары бер миҙгел генә йәшәү,
Күҙең асып, күҙең йомғансы...
Яҡты донъяларҙа йәшәүҙәре
Һәр ваҡыт та танһыҡ булһасы!..
Иҫке өй
Емерелгән иҫке генә өйгә
Ҡарап торҙом уйға бирелеп.
Ваҡыт елдәренән ҡара янған,
Бүрәнәһе бара тирелеп.
Торбаһынан инде төтөн сыҡмай,
Таш һыуығы йәнде өшөтә.
Тирә-йүнен алма, сейә түгел,
Шайтан таяҡтары иш итә.
Булғандыр бит өйҙөң гөрләп торған
Йәнле, йәмле, йылы мәлдәре.
Бөгөн уны урап үтә әҙәм,
Берәү белмәй өйҙөң хәлдәрен.
Ә ул һыҙланыуҙан ыңғыраша,
Үткәндәрҙе һағына төндәрен.
...Хужа бында ярыҡ тәҙрәләрҙән
Бәреп ингән әсе елдәре.
Иҙәндәрҙең серек таҡталары
Шығыр-шығыр илай таңдарҙа.
Эй, иҫке йорт, был мәл хужаларың
Йөрөй икән ҡайһы яҡтарҙа?..
Хәтерләтте
Аҡ сәскәләр тирбәлешә елдә,
Хәтерләтеп йәшлек таңдарын.
Йылдар үткән һайын йәшлек-яҙҙан
Алыҫая ғүмер ярҙары.
Ҡул болғаным әле үткәнемә,
Яҙмышыма юҡ, тип үпкәләр.
Аҡ болоттан тамған күҙ йәштәрҙән
Янып-көйөп ҡалды сикәләр.
Әллә инде йылдар һалған эҙҙәр...
Ни сәбәптән моңһоу күңелем?
Аҡ сәскәләр хәтерләтте бөгөн
Был гүзәллек миңә түгелен...
Шиғырҙар шәлкеменең тулы вариантын журналдың 11-се (2020) һанында уҡығыҙ.