-5 °С
Болотло
Бөтә яңылыҡтар
Әҙәби балҡыш
30 Апрель 2020, 18:22
«Ҡатын-ҡыҙ – донъя тотҡаһы, Ул – таяныу нөктәһе»
Рафиға УсмановаРФ һәм БР Яҙыусылар, Журналистар берлектәре ағзаһы, Башҡортостандың атҡаҙанған мәҙәниәт хеҙмәткәре Рафиға Карам ҡыҙы Усманова Борай районы Боҫтанай ауылында тыуған. БДУ-ның филология факультетын тамамлағас, Краснокама районының «Кама таңдары» гәзитендә эшләй, «Кызыл таң» республика гәзитендә үҙ хәбәрсе була. Яңыраҡ тынғыһыҙ ижадсы ғүмер миҙгеленең 65-се үрен яуланы. Уға илһамлы көндәр, бәхетле миҙгелдәр, иң изге теләктәр юллайбыҙ.
Затым
Мин – ҡушылма,
Боҙ һәм ялҡын.
Кемгә эҫе,
Кемгә һалҡын.
Туңдырам да,
Өрәм ялҡын –
Ҡатын-ҡыҙ ҙа
Минем затым.
***
Тормош тәгәрмәсен тәгәрләтеп,
Алға барам тиһәң, юл яраһы.
Сәтләүекте көслө заттар вата,
Был донъяла ирҙәр идараһы.
Тирмәнгә лә һыуҙы улар ҡоя
Һәм дә яра бөгөн бар ярманы.
Ил башында, түр башында – улар,
Һәр дарманға барҙыр фармандары.
Был донъяла ирҙәр идараһы,
Гүзәл заттың ҡаршы һуң ҡайһыһы?
Ирҙәрҙе – ир, тормошто көр иткән
Ҡатын-ҡыҙ ҙа бөтә илһамсыһы.
Анамын
Кисүлимен,
Табам бала,
Мин – Ана!
Үлем менән тартышта
Йән ярала.
Аҡ юл күрәм дәүерҙәргә
Бараһы.
Киләсәккә бәйләй мине
Нарасый.
Бишегемдә сабыйым бар –
Анамын.
Ер шарын мин әйләндереп
Торамын.
Хурлама
Теймәсе мин-минлегемә,
Көсһөҙ зат тип хурлама.
Зарурлығымды сикләп,
Ғорурлығым урлама,
Хурлама!
Оноттоңмо әллә, дуҫҡай,
Тарихтарҙа шул һырлана:
Ир заты бөгөлгән ерҙә
Һынмай ҙа һәм һығылмай ҙа
Ҡатын-ҡыҙ еңеп ҙурлана –
Йырҙарҙа дан йырлана,
Көсһөҙ зат тип хурлама,
Хурлама!
Ҡатын-ҡыҙға мәдхиә
Йәшәйештең бар ғәме һеҙ,
Табындың икмәк тәме.
Был донъяның ғәжәп хайран
Нур балҡып торған йәме.
Һеҙ барҙа гөлдәр сәскәле,
Һоҡландыра шул сағы.
Һеҙҙең ялҡындар ҡабыҙа
Ғаиләләр усағын.
Мөхәббәт тә, һөйөү, наҙ ҙа –
Барыһы һеҙгә тоташҡан.
Аҫыл заттар, ғәли заттар,
Ханымдар үә туташтар.
Изгелек фәрештәләре,
Бер йырҙыр тыуаһы һеҙ!
Яҡты нурҙан ғына торған
Тормоштоң Ҡояшы һеҙ.
Һоҡланғыс һеҙ, Таңһылыуҙар,
Фәриҙә, Зәлифәләр,
Рәйлә, Миләүшә, Диләләр –
Ерҙәге алиһәләр.
Күкрәк һөтө, бишек моңо...
Сабый тыныс йоҡлаһын.
Иңдәрендә–мең мәшәҡәт,
Ҡатын-ҡыҙ–донъя тотҡаһы,
Ул – таяныу нөктәһе.
И ҡатын-ҡыҙ!
Ай-Ҡояштан
Гүзәлерәк
Һеҙҙең йөҙҙәр.
Илаһ нурҙар
Сәсәләрҙер
Һеҙҙең күҙҙәр.
И ҡатын-ҡыҙ,
Был донъяның
Яҡтылығы
Бары һеҙҙән.
Ғаиләнең
Усағын һин
Һаҡлаусыһың.
И ҡатын-ҡыҙ,
Һин ерҙәге
Мөхәббәтте
Һаҡлаусыһың.
Йәшәйештең
Дауамы бит –
Ул һәм ҡыҙҙар.
Һеҙ тибрәткән
Бишектән дә
Изге ни бар?
И ҡатын-ҡыҙ,
Һиндәй серле,
Һиндәй сихри
Ниндәй көй бар?
Икмәк һала,
Бала баға
Һеҙҙең ҡулдар.
Ғаләмгә лә
Һуҡмаҡ һала
Һеҙҙең юлдар.
И ҡатын-ҡыҙ,
Донъяны гел
Ожмах итер
Һиндә нур бар!
Читайте нас:
© 2020-2024 Сайт журнала "Башҡортостан ҡыҙы". Копирование информации сайта разрешено только с письменного согласия администрации.
Телефон
8 (347) 273-26-89
Электрон почта
Адресы
г. Уфа, ул. 50-летия Октября, 13, 7-й этаж
Редакция
8 (347) 272-63-02
Ҡабул итеү бүлмәһе
8 (347) 273-26-89