+12 °С
Ямғыр

Бөтә яңылыҡтар

Әҙәби балҡыш

3 Апрель 2019, 12:52

«Асты миңә күк ҡабағын халҡымдың тел асҡысы...»

Таңһылыу Ҡарамышева Күренекле шағирә, Башҡортостан Республикаһының атҡаҙанған мәҙәниәт хеҙмәткәре Таңһылыу Ҡарамышеваның шиғырҙары һутлы образдары аша төрлө фәлсәфәүи һығымталарға килеп, күңелдәрҙе тик яҡтылыҡҡа йүнәлтергә, иң нескә ҡылдарҙы тирбәтергә һәләтле.

Алҡынлыҡ

Аҡҡан һайын алҡын һыуҙар

Тәрәнәйә, киңәйә,

Тулҡындары ҡеүәтләнә,

Ярҙары бейегәйә.

Аҡҡан һайын алҡын һыуҙар

Йыя ваҡ йылғаларҙы...

Тәрән кешеләр ҙә, ах(ы)ры,

Ҡабатлай даръяларҙы!

Төпһөҙлөкһөҙ бейеклек юҡ,

Юҡ күктә елкенәһең!

Һай кешегә сумыу менән

Ҡомона төртөләһең.

Аҡҡан һайын алҡын һыуҙай

Булһа икән дә байып,

Йәшәй-йәшәй ғүмереңә

Йылдар өҫтәлгән һайын...

Һөйләшеү

Телем әйтә алмағанды

Ишетһәнә! –

Шып-шым ғына ултырайыҡ,

Әйҙә, йәнә!

Күҙҙәр күрә алмағанды

Күрһен күңел.

Һөйөү өсөн күҙелдерек

Кәрәк түгел.

Һүҙҙәр... Күҙҙәр... Аңла, йәнем,

Тынлығымды.

Нимә менән һулайым мин? –

Той тынымды.

Ҡолаҡ менән яратмайым

Инде күптән.

Күҙ һоҡлана, йөрәк һөйә

Яҙып иҫтән.

Шып-шым ғына ултырайыҡ

Әле, иркәм.

Бар хистәрҙе әйтеп бирһен

Яҡты иртәм.

Таш ташланым

Таш ташланым һыуға бер киҙәнеп...

Ҡыбырланы тулҡын, йәйелде.

Дәү ташымдан дәү тулҡындар сыҡты,

Кескәйенән – саҡ-саҡ кәйелде.

Уй ташланым күңел иҙеленә...

Тулҡынланмай инде ҡалһана!

Һәр бер киҫәксәһе телгә килде –

Хәрәкәткә килде бар һауа!

Таш ташланым... Һайҙа, сөмбәйҙәрҙә

Ойоп ятҡан көстө уяттым.

Әйтерһең дә, бер урында торған

Ҡаҡҡан ҡаҙығымды ҡуҙғаттым.

Рәхмәт әйттем шул саҡ тулҡындарға,

Мине йәнләндергән саҡтарға,

Ерҙе ярып сыҡҡан йылғаларға,

Тауҙы ярып сыҡҡан таштарға.

Арналыш

Нуры төшә күңелемә

Көнбағыш ҡояшының.

Хас сабыймын, тоям наҙын

Донъяның ҡарашының.

Бер тапҡыр һәм һуңғы ҡабат

Уға бит биргән һәләт:

Ҡояшҡа ғына ғашиҡлыҡ,

Яҡтылыҡҡа мөхәббәт.

Борғоланмай көнбағыштар,

Йәшермәй ысын йөҙөн,

Ҡараңғыға ла ҡарарға

Баштары ике түгел.

Бирелгән был үҫемлеккә

Орлоҡтан уҡ аңланыш:

Мөһим тыуғас ҡара ергә

Сығыш түгел, арналыш.

Кем икәнде, ни икәнде

Күрһәтә бағышланыш.

Наҙланамын, күңелемдә

Ҡояшлы ҡарашланыш.

Бармаҡтар

Орсоҡ тота, бәйләм бәйләй,

Энә тота, сигеү сигә, –

Бармаҡтарым – ҡармаҡтарым,

Ептәр һаплай, теген тегә.

Орлоҡ сәсә, түтәл утай,

Һыйыр һауа – елен тарта.

Ҡалаҡ тота бармаҡтарым,

Буш ҡалдырмай, – яҙмышлата.

Емеш тирәм, алма өҙәм, –

Тиккә үтмәй тәүлектәрем.

Бармаҡтарым тиҫбе тарта,

Бар минең дә тәсбихтәрем.

Ҡәләм тота – яҙа, һыҙа,

Ғазаплана бармаҡтарым.

Ҡабығынан әрсей һүҙҙе, –

Эҙләп таба Аллаһтағын.

Эй, Хоҙайым, һәр бармағым

Нисек мине яратмаһын,

Был донъяға иғтибарһыҙ,

Бармаҡ аша ҡаратмаһын!

Тәүбәм булһа, яң(ы)лышҡанда

Янамаһын бармаҡтарын!

Тырнаҡ осон да тигеҙмәй,

Ғәфү итһен һармаҡтарын.

Бер сәбәпһеҙ көләм ҡай саҡ...

Быныһы ла Аллаһтандыр:

Һәйбәтлек тә, насарлыҡ та

Гонаһлы ун бармаҡтандыр...

Асҡыс

Астым бикле йөрәгемде,

Сәскә асылған кеүек.

Урғылдырҙым хистәремде,

Шишмә атылған кеүек.

Көтмәгәндә килеп сыҡтым

Болонлоҡ сәскәһенә,

Һары һағыш сүллегенән

Һөйөнөс сәхрәһенә.

Сөйөлдө ҡош... Ҡанаттарҙың

Асылды ҡауырһыны.

Күңел илһам кисерергә

Торманы ауырһынып.

Ай тыумышы, көн байышы,

Йондоҙҙарҙың балҡышы...

Асты миңә күк ҡабағын

Халҡымдың тел асҡысы.

Читайте нас: